Pink 14: محاولتي دعوة إحدى المدرسات الغير مسلمات إلى الإسلام -٢-

السلاآآآم عليكم ورحمة الله تعالى وبركاااااته !!

مينا كيفكم؟
فاكريني @@ ؟
يب يب  (o´ω`o)
أنا صاحبة المدونة النايمة دي!
ريني ديـــــــس ! (●⌒∇⌒●)

مدري إذا تفتكروا ولا لا،، بس قبل فترة كتبت تدوينة في يومياتي "بنك" عن محاولتي لدعوة وحدة من المدرسات للإسلام ،،
"هنـــــــــاآآآ"
وماكملتها على حس إني أشوف إيش يسير لي بعد المغامرة الخطيرة اللي سويتها  (¬‿¬)
أوك حأكمل دحين بإذن الله (o⌒皿⌒o) 
بســـم الله تبدأ ،،
"
طبعاً بعد اللي حصل داك اليوم وأنا أحاول قدر الإمكان علاقتي بأستاذة (أ) تكوون مررة عاادية ولا كأنه سار شي ولا كأني أنا عملت شي ،، وطبعاً الشي دا مرررة صععععب كنت حاسته بعد التوتر اللي عشته ،،
اللي ريحني إنو المس كانت مرة عادية ولا كأنو شي ،، فقلت شكلها ما شكّت فيّة ولله الحمد ،،

بعدها بكم يوم كنت ماشية وبأتكلم مع وحدة من صحباتي في مبنى المعلمات،، وكنا بنمشي قريب من المدخل " كل ما مدرسة تبغا تدخل ع مكتبها تدخل منه ،،"
ففجأة وأنا ماشية شفتها دخلت ،، المفاجأة مو في دخولها،، المفاجأة كانت في إنها كانت لابسة حجاب على راسها (°ｏ°) !
إيوة وكان لونه رمادي كمان! "لصق اللون في راسي من الصدمة!  (*≧▽≦) "
المهم! في وقتخا قلت لصحبتي:
" هية (أ) مسلمة ؟؟؟!!!!!!! شوفيها لابسة حجاب !! "
أغلب بنات تخصصي مايدروا إذا كانت مسلمة أو لا ،، بس بالنسبة لبنت في حالتي "وبعد اللي صار كمان" كنت من جد أبغا أعرف !

هادا موقف ،،

الموقف التاني حصل بعده بفترة ،، راجعتها كنت أبغا منها كم شي ،، وطبعاً رحتلها في مكتبها ،،

لمن رحت لمكتبها ماكانت موجودة ،، وكان جنب مكتبها بنوتة بتعمل مشروع تخرجها الله يسهلها ويعينها ،، مرة حبوبة ربي يسعدها،،

بدأت تتكلم معايا وتسألني كلمة ع كلمة سألتها ،، " (أ) مسلمة ولا لا؟"

" لا ما أظن ،، "

" بس أنا لقيتها قبل كدا حاطة فاصل كتاب عليه آيات قرآنية في مكتبها !"

" ترا هية عادي تحط وتاخد أشياء زي كدا ديكور عشان تعمل زينا ،، ولا هية ماهي مسلمة "

المحادثة الصغيرة دي غيرت أشياء كتيرة بخصوص نظرتي للمدرسة دي ،،

قلت مستحيل أنا " أو أي شخص " أحتفظ بشي أو أحطه ع مكتبي إن ما عجبني وأقتنعت بجماله وبصحته ،،

ولا؟

المهم جات الأستاذة ودخلنا مكتبها ،، وهناك كانت المفاجأة التاانية ،،

( لقيييت الكتييب اللي رمييته تحت باب مكتبها حاطته ع ستاند الورق فوووق مكتبها ! )

عارفين أنا عاد شعوري كيف كان؟؟ متخيلين قلبي كيف كان يضرب من التوتر؟

ستييين سؤال وسؤال كانوا بيطيروا في مخي ،،

"طيب هي أسلمت ؟ ولا تبغا تسلللم؟؟ ولا تبغا تطّلع ع الكتيب ؟ ولا بس كدا شالته مالقت مكان تحطه فييه؟؟ ولا إييييش؟؟!!! "

قلت في نفسي دام ربي أراد تشيلوا من الأرض وتحطوا ع ستاند الورق فوق مكتبها معناته أكيد ربي رايد خير بالشي دا ،،

طبعاً خلصت شغلي معاها وأنا مخي مو معايا ،،

بصراحة كنت متحمسة ومتوترة في نفس الوقت مدري كيف أشرح مشاعري ،،

بعدها بفترة ،، عملت أنا ووحدة من صحباتي " أمريكية " مشروع لمادة الفيزياء عن " الفيزياء في الإسلام " وكان كل مشروعنا

عن آية ( مرج البحرين يلتقيان ) في سورة الرحمن ،، عن نقطة إلتقاء المياة المالحة بالحلوة ،، وكيف إنهم ما يختلطوا ببعض سبحان الله ،، المشروع كان كله يتكلم عن الإعجاز العلمي في القرآن وعن قدرة الله سبحانه وتعالى ،، فكان من أول أهدافنا أنا وصحبتي "المدرسات الغير مسلمات" بشكل عام ،،

في يوم المشروع ،، كنا ملصقين الآية مع العنوان Physics in Islam ،،

طبعاً عرض المشاريع كان وقت اللنش بريك ،، فمرت أستاذة (أ) من عند مشروعنا وقالتلي،،

" هادا مشروعكم ؟"

" إيوة مس "

قبل ما أكمل كلامي قرأت الآية والعنوان وقالت

" شي يخص الإسلام ؟"

"إيوة "

كانت شايلة سندويتش في يدها بحكم إنو اللنش ،، كملت أكله ورفعتلي يدها تقولي " Good Luck "

ومشيت بسرعة،، وتركتني شبه متأثرة ونوووقطة مجروحة إنها ما شافت ع الأقل إيش كنا بنقدّم في المشروع ..

سبحان الله في داك اليوم ربي يسرلنا وحدة من المسات "هندوسية" ماهي مسلمة جات شافت مشروعنا وجلست تسمعلنا وتتفرج ع الفيلم اللي كنا حاطينه وأتفاعلت معانا الحمد لله ،،

شوفوا أنا كنت أبغا مين تحضر وربي كتب لمين تسمع ؟

الله يهدي (أ) وجميع اللي زيها ويوريهم الخطأ من الصواب ،،

آمييين آميييين آميييييين ،،

حاجة أخيرة حابة أقولها قبل ما أختم تدوينتي :

كل واحد فينا لازم يسعى باللي يقدر عليه ،، حتى لو كان شي بسيط،، ياما كانت إبتسامة ود سبب في إسلام الكثيرين ،،

فلا نقعد نقول مانقدر وماعندنا الجرأة ،، الحمد لله الأيام دي سار في مطويات ومواقع وروابط للصبح ،، فاللي ماعندي جرأة كافية

"زيي في أغلب الأوقات" يقدر يوزع مطويات أو يحطها في أي مكان توصلها أيدي الناس الغير مسلمين ،، حتى لو قري ومشي

صدقوني إلا رح يتحرك في قلبه شي لو ربي رايدله خير ،، صحيح ( أ) ما أسلمت، مستحيل أساسا تسلم بسرعة قبل ما تقتنع ، بس أنا متأكدة بإذن الله ما احتفظت بالكتيب عندها لمجرد الاحتفاظ به، وكونها مشيت بسرعة من قدام مشروعي إن دل على شيء فأنا أشوفه يدل إنها عارفة إنو مشروعي يتكلم عن شي صحيح وماتبغا تخربط نفسها ،، الله يشرح صدرها للإسلام وجميع غير المسلمين ،،

وأذكركم بقول حبيبي رسول الله:

"لأن يهدي الله بك رجلاً واحداً خيرٌ لك من حمر النعم" -رواه مسلم-

اللهم أعنا على تبليغ رسالتك بالطريقة التي تليق بها وعلى أكمل وجه ،،

آمين.

في أمان الكريم،،

ماذا تعلمنا من الأستاذ أحمد الشقيري عن اليابان في رحلته ..؟

في الحقيقة كان برنامج خواطر5 أفضل مآشاهدته في تلك الفترة وكنت متابع وبقوة لجميع الحلقات كآن بمقدمه أحمد الشقيري يتكلم عن اليابان وقد تم تصويره في اليابان بالكامل. حيث تم من خلال الحلقات المقارنة بين أخلاق النبي وصفات المجتمع الياباني وكيف أنهم يطبقون بعضًا منها وهم على غير الإسلام , وهنا أبرز ماقاله الشقيري عن اليابان:

أتمنى ألا نقول (أريد أن أعيش في اليابان) ولكن أن نقول (أريد أن أعيش في بلدي لأطورها وأجعلها مثل اليابان بل وأحسن).

~

أتمنى ألا نقول (لن نصل إلى ما وصل إليه اليابانيون ولو بعد مئة عام) ولكن أن نقول (سنصل بإذن الله لما وصلوا إليه وأحسن خلال جيل واحد فقط..فهذا كل ما نحتاجه لتغيير أمة بأسرها).

~

أتمنى ألا نقول (لا نريد أن نرى تجارب غيرنا) ولكن أن نقول بكل تواضع (فلنستفد من تجارب غيرنا حتى نرتقي).

~

أتمنى ألا نقول (عندنا خير كثير في العالم العربي ونحن راضون عما نحن فيه) ولكن أن نقول (صحيح لدينا خير في بلادنا ولكنه لا يكفي ونطمح إلى المزيد من التطور بشكل مستمر وأسرع فالعالم من حولنا يسير بسرعة الصاروخ ولا يكفي أن نمشي لنتقدم).

~

أتمنى ألا نقول (أصبت بإحباط شديد من رؤية ما وصل إليه اليابانيون) ولكن أن نقول (لدي أمل كبير أن نصل إلى ما وصل إليه اليابانيون فهم بشر مثلنا وكما وصلوا فيمكن أن نصل).

~

أتمنى ألا نقول (ليس بيدي شيء أفعله فالأوضاع صعبة) ولكن أن نقول (لا شيء مستحيل والمهم أن أفعل كل ما في وسعي وطاقتي في المجال الذي أنا فيه وأن أفكر كل يوم بكيفية تحسين أدائي ولو بشكل بسيط ولكن بشكل مستمر).

~

أتمنى ألا نقول (المقارنة ظالمة مع اليابانيين فنحن بلاد ما زالت نامية) ولكن أن نقول (آن الأوان أن نقارن بالأحسن والأفضل وآن الأوان أن نرفع من معاييرنا وأهدافنا وتطلعاتنا لمستقبل بلادنا العربية).

~

أتمنى ألا نقول (إظهار مشاكل العالم العربي فضيحة) ولكن أن نقول (إظهار مشاكلنا ضرورة لعلاجها ، فخمسين في المئة من علاج أي مشكلة يأتي بالاعتراف بها أولا).

أتمنى ألا نقول (السبب هو الآخر فالشعب يلوم الحكومة والحكومة تلوم الشعب) ولكن أن نقول (السبب هو نحن… فكلكم راع وكلكم مسئول عن رعيته…فالشعب راع ومسؤول والحكومة راعية ومسؤولة وكل إنسان مسؤول عما هو فيه من موقع في أهله أو وزارته أو وظيفته أو مدرسته).

~

أتمنى ألا نقول (لهم الدنيا ولنا الآخرة)  ولكن أن نقول (فلتكن لنا الدنيا والآخرة معا كما كانت لأسلافنا فقد جمعوا بين العزة والتطور في الدنيا مع أعلى درجات الفردوس الأعلى بإذن الله في الآخرة).

:

:

:

تذكرة:
لم نذهب إلى اليابان للتمجيد ولا للتقليد, ولكن لنأخذ منهم كل مفيد
الحكمة ضالة مؤمن فحيث وجدها فهو أحق بها.

*منقول*

تقرير بسيط عن زيارتي الثانية لمطعم فوشي الياباني + تجربتي لطبق التيمبورا الياباني ^^

السلام عليكم ورحمة الله عالى وبركاته
!!
^^
مينا سان أخباركم؟!
أتمنى تكونوا بخير وفي  كاامل الصحة والعافية :)
طبعاً أدري تقريري دا متأخر وإنو لية فترة عن المدونة وعن كل حاجة تخص التدوين T^T
بس والله الجامعة وماتفعل!
حتى لو كنت فاضية أحس أبغا أجلس أطالع السقف بس وأسترخي!
فدحين الحمد لله ماصدقت الإختبارات عدت على خير الله يجيب نتايجها ع خير كمان ،،قلت خليني أنزل شي جديد xD

تدوينتي هادي حتكون بإذن الله عبارة عن تقرير لزيارتي الثانية لمطعم فوشي الياباني في المنطقة الشرقية ^^
" في الغربية عندنا للأسف مافي :"( ياارب يفتح "
وطبعاً أنا قررت كل ما أوره أحاول أجرب أكلة جديدة ^^
أول مرة جربت الكاري الياباني ،، " هنــــــــا "

فالمرة دي قررت أجرب التيمبورا! -^- يب يب أدري شجاعة! بس لسة شجاعتي هادي ما تسمحلي أجرب السوشي مازلت مرعوبة منو مدري ليه مع إنو كتيير يمدحولي فيه @@

للي مايعرف التيمبورا هي أكلة عبارة عن روبيان مقلي في دقيق التيبمورا،،


طبعاً "زي ما صار المرة اللي فاتت" أهلي مستحيل يودوني المطعم دا بسهولة :(
وكل ما أقولهم أبغا أروح يقعدوا يتمصخروا علية وع طعم الآكل الياباني وكيف إنو ما ينطاق "الله يكرم النعمة" من وجهة نظرهم ،، وإنهم مايبغوا ياكلوا ياباني!
طيب أنا عاجبني طعمه :( ومو ضروري ناكل كلنا لو بس آخد أكلي تيك أويه ،، مو ضروري نجلس T^T
المشكلة إنو الكلام دا كله يصير قدام مدخل مطعم فوشي لمن نوقف عند الإشارة اللي جنب الفندق اللي نازلين فيه :"(
شعور مؤللللللللم T^T

طبعاً جلست ع الحال ألين ما فضل يوم واحد وتنتهي سفرتنا للشرقية ،، طبعاً حجة ريني فقدت الأمل مرة! xS
بجد والله فقدت الأمل ! :""(
سرت أقعد ورا في السيارة حاطة يدي ع خدي وكل ما مرينا من جنب فوشي أتنهد بألم :$ "متعوب على -ألم- ترا!"

إلا فجأة بابا يقولي " يلا أنزلي أشتري أكلك الياباني "
أنا: O_o
بابا: يلا بسرعة عشان نلحق نروح له مشي لأنو مرة زحمة!
أنا: D:
وع طوول نطيت من السيارة وأنا فاتحة كاميرا جوالي وهاااااتك يا تصوير ^ـ^

أنا للأسف صورت المدخل والدرج بس "فيديو" ^^" بإذن الله أزبطة وأرفعه لكم تشوفوه لو قدرت!
طبعاً تبااااااارك الرحمن زي منتو شايفين في الصورة الديكور والترتيب في المطعم شي شيي خيااالي!
ألوان وتنسيق مرة مريح للأعصاب ^^ شي شيي تستمعوا وإنتو تطلبوا،،

طبعاً أنا أول ما جا النادل ياخد الطلبات قلتلو "تيمبورا! ^^ " بكل ثقة!
فتح الآدمي المينيو قدامي يبغاني أتأكد قلي عقلوا ما أعرف إيش عندهم كمان ،، مايدري إنو المينيو كاملة حقتهم عندي أخدتها من الزيارة الأولى xD
قلتلو إيوة تيمبورا ،،

بس وطلب مننا نستنا شوية ألين ما يحضرلنا الطلب لأني أبغا آخده معي الفندق ^^

بعد ما جبلنا النادل الله يجزاه خير الطلب ،، دفعنا وع جول جري ع الفندق ،،
تبارك الرحمن كانوا حاشيين العلبة بقللللللللب!
تبارك الرحمن حاطين ٤٠ حبة بالزبط!
مطبقين مباديء الكرم السعودي خخخخخ أغررررف وكل بالعافية!
مع إنو مو شي صحي أبداً للأسف *^* الكرم يا كون في الطفس!

الموووهيم! ^^
رجعت البيت وبسررعة فكيت التشوبستيكس حقتي وفتحت العلبة وهادا اللي كان قدامي!

طبعاً كانوا حاطينلي كيس صغير كنت أحسبه بطاطس مقلية :$ ومرة كنت مبسوطة ألين ما فتحته واكتشفت إنو سلطة للتيمبورا بصلصة الصويا :/ يلا عادي سامحتهم xD !!

الموهييييم! ^^
ريني أوبا-تشان من أول نظرة أتخيلت إنها حتدوق شي طعمه زي طعم الجمبري المقلي حق مطعم البيك "جونااااني"
فعشان كدا أخدت لقمة كبييرة وع طول جلست تمضغها بدون تفكير ،،
وكانت الصدمة!!!! xSS

دقيقة لحظة عشان أكون صريحة! الطعم ما وحش أبداً!!
بس عشان تعرفوا قصدي بالصدمة ،، أتخيلوا إنكم بتاكلوا سمك بدون طعم،، تماماً بدون أي طعم أبداً وبدون مبالغة!
في البداية من جددد أنصدمت لأني كنت متخيلة شي " زي جمبري البريك " ،، ونسيت تماما إنو الأكل الياباني بعض أكلاته بهاراتها قليلة ^^" "المرة اللي فاتت جربت الكاري وكان مرة مبهر بطريقة حلوة فجا ع بالي التيمبورا تكون زيو"

فأخدت التيبمورا وغطستها في سلطة الصويا ،، وكان طعمها جيد جداً ،،
يعني بإختصار تقييمي للتيمبورا اللي دقته جيد جداً ،،
شكلهم ما صفوه من الزيت مزبوط كمان لأني بعد كم حبة حسيت كأني ماسكة قارورة زيت وبأشرب منها :/

الفائدة اللي "أنا" أطلع منها من التجربة القميلة اللي فوق :
إحتمال ما آكل التيبمورا مرة تانية إلا بعد فترة ألين ما أنسى طعم الزيت الرهيب اللي كان معاها :S
غير كدا ممكن أجربها بس بعدييييين مرة بإذن الله ^^


إذا حابين تشوفوا الصور أوضح حأنزلها بإذن الله في إنستجرامي وتويتري وتمبلري! <- p="p" xd="xd">تقدروا تلاقوا كل حساباتي ع النت ع صفحتي هنــــــــــا


أتمنى يكون تقرير البسيط وتجربتي الأبسط عجبتكم ^^
ولو كنتوا جربتوا أكلة يابانية قبل كدا يسعدني أعرفها وأعرف رأيكم فيها لحتى أحاول أجربها ،،
أو ممكن أنزل تجاربكم في تدوينة من تدويناتي لو كانت كتيرة بإذن الله :$

في أمان الكريم ..