مشترياتي من دايسو ، إيبو : )

السلام عليكم ورحمة الله وبركاته
مينا-سان جينكي ؟ 
الحمد لله سعيييدة جدددن جدددن  !
زرت المنطقة الشرقية الأسبوع الماضي واستمتعت بزيارة محل دايسو للمرة الثانية في حياتي <- مسكينة     !
ومحل إيبو الجديد كمان ( رحت له مرتين في منطقتين مختلفة )


وحابة أوريكم الأشياء اللي اشتريتها من كل واحد فيهم ،،
بس أول شي حابة أقول رأيي بخصوصهم:
طبعاً مهما كان إيبو جديد مستحيل يوصل لمستوى دايسو ،
من ناحية الأسعار والجودة والصناعة،،
إيبو أسعاره شوية غالية مقارنة بدايسو،،
دايسو أخرج معبية كذا كيس ما توصل ٢٠٠ ريال وإيبو أخرج بكيس واحد بأشياء مرة قليلة بالراحة ٨٠ وفوقها ،، 
خير ؟
عيدان الأكل طقم خمسة  أزواج بسبعة ريال تقريبا في دايسو ، وإيبو زوج واحد بستة


حتى الأشياء الموجودة في دايسو تلاقيها ( صنعت في الصين ) لصالح دايسو ،،
يعني دايسو داخل فيها فيها ،،
بس في إيبو شي صيني بحت ، وشي ياباني ، وشي ماله علاقة باليابان والصين ( زي أنجري بيردز   ! )


غير كدا دايسو أدخله وأنا خارجة أشتهي أبكي أحس نفسي خارجة من اليابان :،( <- إحلفي!
لا والله من جد المحل يعيشك جووو بالديكور والزين اللي فيه 


آخر شي ، دايسو أكبر من إيبو وتشكيلته مررة كتييرة ما شاء الله ،،
هادا لا يعني إني أعيب في إيبو ، لا والله أبداً استمتعت في المحل لكني أفضل دايسو أكتر ،،


نروح للصور:
من -دايسو- صورة للمحل من برة *قلوووووووووب* 

طبعاً أنا بمجرد وقوفي قدام المحل سرت أتكلم وأتحرك بس بدون وعي  !
طبعاً ما أقدر أصور من جوة بحكم إنشغالي خخخ ! 

أول شي أخدته كان طقم الشاهي الجميل دا 
مع إني ندمت شوية لمن لقيت واحد أبيض عليه ساكورا بنكي في إيبو ،، بس يلا قدّر الله وما شاء فعل
هادا يختلف عن الموجود في إيبو إنو تصميمه ياباني ،، ( المسكة اللي ع جنب ) فعشان كدا سرت مقتنعة بيه  أكتر 

وهادا الكوب الجميل خبلللني مررة حسيته كوايي   !
كوب بالغطاء حقه لحتى تحفظي المشروب بارد
إحتمال أخليه كوب الجامعة 

يا ترى عرفتوها  ؟
يب يب فرشة البامبو اللي نلف السوشي بيها ،،
في منها مقاس أكبر بس أنا أخدت الصغير أفضل وأسهل في الإستخدام

مستحيل أكون أنا إن ما أشتريت شي يخص الأظافر 
هادي ( بيس كوت ) طبقة أساس للظفر تحطيها قبل لا تصبغيه لحتى تحمي الظفر من المناكير ،،

الكريم هادا من كترة ما قريت عنه وكثرة استخدام اليابانيات له اشتريته!
الكريم عبارة عن قناع طيني بالفحم ( لونه أسود شي يجيب الفجعة  ! ) قابل للتقشير
لأنه الفحم شي طبيعي ويساعد ع التنظيف وتنقية البشرة إلخ إلخ إلخ 
تحطيه على وجهك بعد ما تغسليه بالغسول اليومي وتستنيه ألين ما ينشف ،، وتشيليه عادي

شنطة جميلة اشتريتها بهدف أخليها لملابس الجيم وأدوات الرياضة حقت الجامعة ،،
حجمها طيب وتشيل أشياء كتيرة ما شاء الله
بس لمن قريت ورقة السعر كاتبين عليها إنها ( حقيبة تسوق )
على طول قلت في نفسي ( يناسووووو  ! )
يعني همة يشيلو الأشياء دي وقت ما يتسوقوا ؟
يا عيني علينا أكياس غاية التوفير و بندة وشايفين نفسنا  !
بليز برة يا إحنا 

محتاجين وصف ؟ 

شنطة صغنطوطة عجبتني أحط فيها المكياج في الشنطة بدل ما أتركه حايس على بعضه 

مضارب بادمنتون  

الكريم دا خاص بتنظيف الأنف فقط ،، عبارة عن قناع قابل للتقشير
جدا جميل واستخدامه أجمل

فرشة جميلة ومخدات أجمل للكوتاتسو حقتي وسريري ،،
مخدااتهم شي تااني 

مقلمييية بنكي 

حاقة قميلة قددن قدددن 
مروحة ( أوتشيوا ) المهرجانات اليابانية 
عندي وحدة غيرها من زيارتي اللي فاتت بس شكلها مختلف ،،
حبيتها جددددن 

هادي أوتشيوا تانية بس مختلفة جدا عن اللي قبلها ،،
الأوتشيوا هادي سادة ،
بحيث إني أزينها باللي أبغاه أنا على كيفي،،
حجمها كبير ومرة حلو ما شاء الله 

هادا الشي قصة حب 
ما صدقت إني لقيته كان نفسي في أي لبس ياباني والحمد لله ربي رزقني هوة
صحيح كان نفسي في الأحمر حق البنات بما إن الأزرق حق الأولاد بس ما كان موجود ،،
الحمد لله شي أحسن من لا شيء 

هادي بوسترات قماش حقت المهرجانات ،، 
ناوية بإذن الله أعلقها في أي مكان في غرفتي، حتى لو ما كانت ماشية مع ألوانها ،،
أبغا أقلب غرفتي مهرجان ياباني 


الصور الجاية واضحة بإذن الله عشان كدا حأحطها بلا تعليق ،، ( التعليق أتركه لكم مينـــــآ )
دوزو دوزو 

وحدة من الهاشي اللي اشتريتها من إيبو انكسرت وأنا أحاول أصلحها ( كانت مايلة شوية ) 
قدّر الله وما شاء فعل ،، 

------------------------

دحين نجي لأغراض محل إيبو 
- للأسف ما لحقت أصوره لأنو المول كان مليان مرة، وفي الزيارة التانية برضو مالحقت لأني كنت مستعجلة شوية  -


دوزو 

فواحات بريحة الساكورآ 
شي شي الريحة توديك كوكب اليابان ما تشتهي ترجع مررة عاالم تااااني 

هادا الشي خبللللني  !
كوايي كواييي شنطة صغنطوووطة مرة لزيزة ما شاء الله ناوية بإذن الله ألبسها في الجامعة أحط فيها الجوال ومفتاح اللوكر  

اللي تحت هادا بلاستيك لتنظيف الفم ،،
جاري تجربته بإذن الله 

بس هية دي أغراضي من إيبو ..
ملاحظين الفرق بينها وبين أغراضي من دايسو 
دايسو أكتر لأن تشكيلته كبيرة تبارك الرحمن 




مينا-سان أتمنى من كل قلبي إنكم استمتعوا بالتدوينة البسيطة دي ^^ 
أشوفكم في تدوينة قريبة بإذن الله
في أمان الكريم ،،