Pink 11: محاولتي دعوة إحدى المدرسات الغير مسلمات إلى الإسلام -١-

السلام عليكم ورحمة الله وبركاته !

يا إني عشت موقف مرعب!!
قصة قصيرة -طاازجة بأكتبها من أرض الحدث!- عن محاولتي دعوة إحدى المدرسات الغير مسلمات إلى الإسلام,,
رح أرمز لها بـ ( أ )

من فترد وأنا أراقب تصرفاتها(ماتقول السلام عليكم) وقت دخولها للمحاضرة,
وما تقول (إن شاء الله)زي ما أغلبية المدرسات يعملوا,
وتلبس عباية بدون ماتغطي شعرها,
المهم أنا سرت حاطتها في راسي هي وكم وحدة زيها,فكرت مدة طويلة كيف أعرض عليها لإسلام؟
بصراحة أنا ماني من النوع اللي ممكن أوقف وأحاجج وحدة غير مسلمة أتوتر بسرعة!
للأسف ماعندي جرأة ومازلت أحاول وأبذل جهدي إني أسير أشجع :S

المهم,,
فتحت دولاب مكتبي أمس ولقيت كتيب دعوية بالإنجليزي,,
كان عنوانه ( حوار بين مسلم ونصراني )
فرحت من كل قلبي وجات على بالي المدرسة أ,,

قررت إني أروج تاني يوم بإذن الله وأرميه من تحت مكتبها,,
كنت خايفة من إنها ممكن ترميه أو ترفزه برجلها لو شافته,, لكن وحدة من قريباتي الله يسعدها قالتلي
( أرميه من تحت الباب وقولي - وما رميت إذ رميت ولكن الله رمى -)

حطيته في الشنطة وأنا كلي حماس إني أروح أحطه تاني يوم..
ورحت الجامعة ولله الحمد ..

كانت أ علينا أول محاضرة,,
خلصت أول محاضرة وجلسنا نتكلم أنا وهية شوية ( عادتنا نتكلم سوا بعد المحاضرة )
وخرجت  أنا ع مبنى المدرسات,,
كانت نيتي أروح لوحدة من المدرسات أبغاها في شي وبعدين أروح لمكتب المدرسة أ ,,
وأنا في طريقي أفتكرت إنها فاضية دحين وما عندها محاضرة
( يعني رح تكون موجودة في مكتبها! )

فكرت بيني وبين نفسي شوية وبعدين قررت أروح أشوف يمكن ماتكون موجودة.. :| يمكن راحت تفطر؟
ورحت ع مكتبها طوالي,,
وفعلا الحمد لله ماكانت موجودة!

بس المشكلة,,
مكتب المدرسة اللي قدامها مفتوح,, فخفت مرة إنها تشوفني,, خصوصا إنها صاحبة أ ,,
خخخخخخخ شوفوا إيش عملت xD
نزلت ع رجولي وانحييت بحيث إنها ماتشوفني لحتى أتأكد تشوفي ولا لا,,
لمن أطمنت إنها ماهي شايفتني وقفت بسرعة ورميت الكتيب من تحت باب أ ,,

( واااااااااااه الحمد لله ) هادا اللي كنت بأقولو في نفسي وقتها,,
وأنا ماشية اكتشفت إنو أ جالسة في مكتب وحد من صحباتها,,
المهم أنا مشيت بسرعة لحتى ما تشوفني ( كاد المريب أن يقول خذوني xD !! )

على ماجيت أخرج من الممر اللي فيه مكتب أ ,, خرجت هية من مكتب صحبتها وسمعتها تناديني
( ريني كنتي تبغي شي مني؟ )

قلتلها ( لا بس بأدور ع مكتب وحدة من مدرسات الفيزيا ) ع أساس إني ضايعة أنا ووجهي!
قالتلي ( الفيزيا في الجانب التاني عزيزتي )
شكرتها بإبتسامة شاقة وجهي ومسكت تنورتي وأهرول للمخرج!
أبغى أقصر طريق يطلعني من هنا حاسة إني مرعوبة من قوة توتري!!

أول شي فكرت فيه هوة ( يا الله! شافتني خارجة من الممر اللي فيه مكتبها! وتدخل تلاقي الكتيب! وهو في الصباح ماكان موجود! ما أبغاها تكتشف إن أنا اللي حطيته! )
المصيبة إنو لو اكتشفت,, ما استبعد منها أي شي من الأمور التالية:
تحطططني في راسها! ويا أنا يا هية :(
تواجهني وتسمعني كلمتين أو تقول شي مو حلو عالإسلام ( جاري التدريب عشان أرد عليها في حالة حصل كدا,بإذن الله وياااارب ما يحصل!!!)
أو تشتكيني ع الإدارة! وللأسف كل إدارتنا عربيات مسلمات! لكن من نوعية نشتغل سوا بس ( لكم دينكم ولي دين ),,
:"(:"(:"(

يارب رحمتك!
قعدت أقول لنفسي لا لاتخافي إنتي أتوكلت على الله ودعيتي,,
ويعني لو شكت فيكي كان في كذا بنت في داك المبنى وموضروري يعني تكوني إنتي ممكن وحدة جات الصباح وقت محاضرتكم مع أ وحطته,, صح؟ D:
يس يس! ممكن صح!
إلى الآن أنا حاسة نفسي متوترة فدخلت قلت أحكيكم اللي سار وأعرف رأيكم لعل وعسى وحدة منكم تقدر تطمني T^T

إلى تحديث قادم بإذن الله لتكملة القصة لو سااار شي بس!
( ويااااارب ما يسير :( )