السلام عليكم ورحمة الله وبركااااته!
^^
كيف حال الحلوات؟ إن شاء تمام وبكل صحة وعافية وجمال :)
الحمد لله تاني تدوينة من Reni no Mise! عقبال المية آميين!
سعيدة جداً بالتفاعل الجميل مع التدوينة الأولى "
هنا للي ما شافتها :) "
سواءً عن طريق تويتر أو هنا ع بلوجر!
بجد بجد شكراً لكل عسولة شجعتني وحمستني أكمل!
إن شاء الله أكون عند حسن ظنكم وأنفعكم باللي أقدر عليه،،
قبل ما أستعرض منتجات التدوينة دي،، حابة في البداية أنزل مشاركة حلوة من وحدة سكر هنا ع بلوجر،،
للأسف ما كتبت إسمها،، أتمنى من كل قلبي أعرفه لحتى أضيفه لمشاركتها :)
"
اهلين ~
بصراحه التدوينه وااو و مره متحمسه لباقي التدوينات!! اسلوبك جددا جمييييل وجذاب الله يحفظك يعني احس ودي الحييين اروح اشتري كل المنتجااات اللي ذكرتيها
وبالنسبه لي استخدم الغسول المقشر من كلين اند كلير كويس
واحيانا صرت استخدم صابون فازلين الجديد اللي لونه وردي نسيت اسمه < كفف XD بصراحه رهيب ويبيض بشكل!! اول ما تغسلين وجهك تحسين بالفرق! حتى صديقاتي لما شافوني قالوا وش عندك حاطه فاونديشن بالمدرسه خخخخخخ يعني شي مدهش! < بالله؟ هههههههههههه
موفقه
Keep up & Good luck"
جربت قبل كدا كذا منتج من كلين آند كلير من بينهم مزيل الرؤوس السوداء "كان جيد الصراحة" ،، منتجاتهم حلوة وخفيفة تبارك الرحمن،،
بس بالنسبة لصابون فازلين صراحة ما سبق جربته! بس حمستيني أجربه **
يعطيك العافية حبيبتي ،،
وأحب أفكر للي عندها أي مشاركة،منتج أي أي شيء في الحياة اشترته وفادها فيما يرضي الله طبعاً ^^ وحابة تفيدنا بيه،، تقدر ترسلي هوة هنا ع بلوجر، أو في تويتر لو حابة @Reni_SakuraGirl أو الآسك حقي من هنا،، http://dooid.me/reni-sakuragirl
بعد كدا نبدأ بمنتجاتنا الجديدة ^^
١- طبعاً أنا كنت حابة تكون التدوينة التانية كلها عن الميك آب، بس الشي دا خلاني أغير رأيي!
للي تشوفه أول مرة ممكن تحسبه عدسة كاميرا ^^ وهو في الآساس كوب/Mug للمشروبات!
جمييييل جمييييل تبارك الرحمن بطريقة! *٧* سمعت عن وحدة قبل كدا كانت تبيع الصغير بـ ١٢٠ والكبير بـ١٥٠ ،،
وأنا لقيته في محل السيف بـ ٥٥ ريال بس!
مين يصدق؟!
أكيد أخدته بدون تفكير!
شكل مرة جميل وأحسه مميز لأن مو كتيرين يعرفوه،،
صورتلكم شكل كيس المحل لحتى تعرفوا شكل ^^"
للأسف المحل ماله فروع غير في ينبع وجدة والطائف ( زي ماهو مكتوب ع الكيس )
خخخخخ مين لاحظت إنو اللي مكتوب ع الكاميرا Caniam مو Cannon ؟
أنا اشتريته وما انتبهت كنت قاريتها كانون !
٢- المنتج التاني دا أفضل شيء أشتريته من منتجات المكياج في حياتي! بجد والله ما أمزح!
عبارة عن بيس "أساس ستان" تحطيه ع بشرتك قبل المكياج لحتى يحميها! بجد بجد شي خياااااالي!
إيش اللي يخليكم تقعوا في حب المنتج دا؟
إنو أنا إنسانة بشرتها جدا جددددا حساسة من أي شي أحطه ع وجهي "من المكياج"
بس الأساس دا ريحني بطريقة لا توصف الحمد لله!
ملمسه مرررررة خفيف وناعم زي الساتان، شفاف، ماله ريحة، للبشرة الحساسة، ضد الحساسية
( من الأشياء المكتوبة ع العلبة نفسها )
أشتريته من الدمام، الشاطئ مول، محل إسمه Black & White "طبعاً المحل بكبره تبارك الله قصة حب تانية"
سعره ٣٥ ريال بس!!!!!!
وترى للي شايفين العلبة صغيرة،، أنا كمان كنت مرررة شايفتها ماتكفي،، بس بعد التجربة اكتشفت إنو نقطة
صغيرة ممكن تغطي خدي كله! يعني تحطي نقطة صغيرة تدهنيها بأصباعك ع جفنك، جبينك " المكان اللي حتغطيه بالمكياج" وشوفي النتيجة!
أفتكر أول مرة أستخدمه فيها كنت مسافرة المدينة "أول يوم العيد" وطبعاً لازم أحط مكياج..
أستخدمت الأساس دا ومن الساعة ٩ لأكثر من الساعة ٣ الفجر والمكياااج زي ماهوة كأني دوبي حاطته!
يعني ميزة جديدة فيه إنو يحافظلك ع المكياج ويحمي البشرة من إنها تمتصه،،
حتى لو ربي أراد وحكيتي/عركتي عيني ، أو جات يدك ع المكياج بالغلط،، لاتخافي مارح يتمسح بالساهل ^^
طبعاً أستخدمت لوشن مزيل المكياج من نيوتروجينا اللي أتكلمت عنه في التدوينه الأولى لحتى أمسح المكياج+ الأساس،،
مررررة راااائع لكل وحدة بشرتها تمتص المكياج بسرعة، أو تتحسس بسرعة
٣- قلم آيلاينر سائل من لووك،،
مرة ممتاز للبنات اللي يحوسوا في رسم الآيلاينر زيي ^^!
أحب لمسة الآيلاينر فوق العين! أحس حتى لو بدون شادو أو أي شي تاني، وجود الآيلاينر بالنسبة ليه يكفي،،
والقلم دا ساعدني بعد الله إني أرسم أي رسمة أبغاها بكل سهولة، والحلو فيه لو أبغا أعدل ما يبقع ولا يخرب شكله،،
ينشف ع العين بسرعة،، ويتمسح بسرعة لو حابة تعدلي بدون مايوسخ عينك،،
وترى تبارك الرحمن فيلو بركة! :) يعني أنا القلم نفسه عندي من سنة؟ سنتين؟ ناسية بس مشتريته من زمان،،
عشان كدا ناسية السعر ^^" "بووكس!"
٤- قلم كحل أبيض برضو من لووك "جميلة أشياءها الماركة دي"
يعطي لون مررة حلو وخفيف ونااعم للعين،، بس اللي ماعجبني فيه إنو مايرسم بغزارة،، يعني أوكي يرسم معايا بس خفيف،،
ممكن بعض الأحيان يعجبني الخفيف بس في أحيان تانية أكون محتاجة لون أبيض قوي،،
سعره ناسيته كمان للأسف لأني مشتريته من الآيلاينر اللي فوق ^^"
بالنسبة لمكان بيعهم أعتقد ممكن تلاقوه في أي محل متخصص في بيع المكياج،، منتشره بكترة منتجات لووك فإن شاء الله تلاقوها بسهولة :)
٥- أول منتج ما عجبني! وحبيت أحذر منو ،،
ممن يكون عجب البعض،، بس أنا حابة أكتب رأيي عنه ،،
أول شي، شفته الكلام المكتوب ع العلبة؟ كلللللله أعكسوه!
أول ما أمسح أظافيري ما تعدي دقايق إلا وهية ناااااااااااشفة! لدرجة إني أحسها مشطبة!
بجد والله مرررة ماعجبتني!
وملياااااانة زييييت يعني أفتح المنديل ألاقيه ينقط مزيل ع قلة فايدة لأنها ماتمسح المناكير بسرعة، يعني ممكن ع اليد الوحدة يروحو منديلين وأحس لسة في أثر للمناكير ما نزل،،
٦- الشي الجميل دا برضو مزيل مناكير،،
بس دا أعتبره مزيل المناكير المفضل عندي! عكس مناديل جين تماماً!
شوية منو ع قطنة صغيرة ممكن تشيل المناكير من أظافيري كلها تبارك الله! وبدون أثر وبسرررعة!
حتى المناكير اللي بإكليل أو لمن أحط أظافر،، الأشياء دي تتعب لمن تنزليها بس مع دا المزيل مرررة يريح!
قيمة العلبة الكبيرة دي كلها ١٠ ريال بس!
وتجللللللللللللللس ما شاء الله يعني ماتخلص بسرعة زي المناديل،،
٧- الشيء دا مسسسستحيل أستغنا عنه!!!!!
ما أدخل محل تجميل إلا وأسأل عنه! وما ألاقيه! ألين ما لقيته في محل بلاك آند وايت في الشاطئ مول "اللي اشتريت منو أساس الستان" بـ ١٢ ريال بسسس!!!!
عبارة عن زيت "نقط" تحطيها ع ظفرك "بعد ما تصبغيه بالمناكير" ويخليه ينشف بسرعة!
يعني بدل ما كنت أوقف ساعة قدام المكيف لحتى أنشف مناكيري سرت أحطه وخلال ٦٠ ثانية خلاص أقوم وأتحرك عادي "زي ماهو مكتوب ع القارورة "
مرييح مرة بس عيبه الوحيد ريحته "زي الكلوركس" غير كدا بعد ما تتأكدي إنو مرت ٦٠ ثانية وإنو المناكير نشف،
حاولي تغسلي يدك لحتى يروح الزيت،، لاتتركي عليها إن نشفت أظافيرك خلاص ^^
٨- مآسكارا شفافة من ميشا ^^
جميلة مرة إذا ماكنتي حابة تحطي ماسكارا سودا أو حابة يكون ستايلك ناعم،، تعطيكي لمسة بلل ع رموشك كأنك مغسلتها
*٧* مدري كيف أشرح بس مرررة تعطي جو جميل!
بس المشكلة الوحيدة فيها لو نشفت وكنت مكترة منها ع رموشك ممكن بعد فترة لمن تبدأ تنزل تلاقيها عاملة ع رموشك قشور كأنك حاطة غراء!
أما غير كدا فهي ماسكارا مرة خفيفة وحلوة تبارك الله..
٩- المنتج الأخير عبارة عن صديق لماسكارتنا السابقة وكل مآسكارات الحياة ^^
مقص الرموش " أو كيرلر الرموش بالأصح ^^" "
حلو للي حابة ترفع رموشها شوية وتعطيها شكل،،
تستخدميه قبل ما تحطي المآسكارا ع رموشك لين تلفيها بالشكل اللي تحبيه ،،
نصيييحة من قلب مجرررب :$ لا تضغطي مرة بيه ع رموشك لأني عملتها قبل وشكلي صار مرة لا :$
من قوة ماضغط وشفت شكلها حمدت ربي ما طاحت! P:
وبث!
خلصنا!
طويلة شوية صح؟ أكتر من التدوينة الأولى ^^
ماني حابة أحط عدد معين للمنتجات اللي أعرضها في كل تدوينة، حابة أخلي الشي دا مفتوح ع حسب الأشياء اللي عندي وع حسب المشاركات اللي ممكن تجيني،،
إيش رايكم نخلي التدوينة الجاية عن الفاشن؟ ملابس الجامعة، إكسسوارات،، إلخ بلخ؟
^^
رأيكم يهمني حبيباتي!
أتمنى تكون التدوينة الثانية عجبتكم، وأكيد لاتنسوا تشاركوني في التدوينة الثالثة الشهر الجاي بإذن الله..
إلى ذلك الوقت،،
في أمان الكريم.
:)
