السلام عليكم ورحمة الله تعالى وبركاته
^^.
يا أهلا وسهلا ومرحباً بحبيباتي الجميلات!
منورين الحتة!
طبعاً اليوم أحس التدوينة دي ليها طعم تاني مرة!
اليوم وعلى بركة الله نبدأ أول تدوينة من تدوينات تاغ Reni no Mise -محل ريني- الخاص بالبنوتات فقط ^^
واللي رح أحدثه بإذن الله بشكل شهري!
اتكلمت عنو وعن الهدف منه
هنــــــــــــــــآإأا ،،
زين ماهو باين التاغ اللي فاز معانا هوة Reni no Mise بتسعة نقاط،
Reni's Shop حصل ع ٨ ، و Reni Mania ع ٥ ،،
شكراً لكل الحلوات القمرات العسلات اللي شاركوا في إختيار إسم التاغ ^^
إنتو أجمل كل أبو شي في الحياة !
يسعدكم ربي ^^
قبل ما أبدأ أول تدوينة في التاغ الجميل دا ،،
ترى أنا ماني من الناس المهتمممة تماماً بالأزياء أو المكياج أو أي حاجة تانية،، مجرد بنوتة عادية زيي زيكم
تبغا تفيدكم بالأشياء اللي استخدمتها ونفعتها
وترى ممكن اللي يفيدني ( من منتجات مكياج أو عناية بالبشرة ) ما يمشي مع بشرتك ^^ فحاولي يا سكرة تاخدي
اللي يناسبك لحتى تدعيلي وما تدعي علية خخخخ!
بس!
أتمنى التدوينات هادي تنفعكم وتكون حجة لية لا علي يوم لا ينفع مال ولابنون إلا من أتى الله بقلب سليم ^^
يلا نبدأ!!
أحب أستفتح التاغ دا بالمنتج الرهيب دا! ( كلهم رهيبين الصراحة بس هادا نقطة أرهب منهم ! )
غسول مقشر ومجدد للبشرة من نيوتروجينا
بصراحة أنا استخدمت كذا منتج من نيوتروجينا، بعضها نفع لكن الأغلبية كانت عادي،
بس دا من جد عمل نتيجة تبارك الرحمن! حتى أختي انتبهت إنو في فرق ( أختي من النوع اللي ماتهرج إلا لو كان شي واضح خخخ ) فعشان كدا صدقت!
المنتج تبدأ نتيجة تبدأ بعد أسبوع تقريباً لو داومتي عليه يومياًً مرة قبل ما تنامي،،
بالنسبة لية أحب أستخدم غسولات الوجه ( أو الأقنعة كمان ) قبل النوم، لأنو وقت النوم تحصل أشياء كتيرة في الجسم منها إن أغلب الخلايا التعبانة أو الميتة تتجدد فحلو إنها تتجدد ع بشرة نضيفة ومغسلة،،
لمن تجي تستخدمي الغسول دا يا جميلة، لا تنسي تحطيه ع بشرتك وهية مبلبلة، وتحاولي تفركيه وجهك بلطف بحركات دائرية، لو دقيقة ع أقل شي لحتى سشتغل مفعول الحبيبات اللي في الغسول وتبدأ تقشر الطبقة الميتة وتزيل الدهون الزايدة بإذن الله،،
أما بالنسبة للسعر، والله ناسية كم كان السعر بالضبط بس اللي أفتكره ومتأكدة منه بإذن الله إنو في حدود التلاتينات،
بصراااحة سعره مرررة رائع مقارنة بمفعوله،،
المنتج التاني برضو من نيوتروجينا،،
لوشن مزيل للمكياج ( مايحتاج تغسلي وجهك بعده )
بصراحة المنتج دا عجبني ومرة ريييييحني بعد الله بطريقة مي طبيعية!
خصوصاً إني اشتريته قبل العيد فنفعني أكتر ولله الحمد، أستخدمت قبل كدا مناديل نيوتروجينا لإزالة المكياج بس
ما ناسبتني وكانت تحرقني شوية لمن أستخدمها وما تزيل المكياج بسرعة،، بس هادا اللوشن مرة سريع مفعوله تبارك الرحمن،
تستخدمي قطنة صغيرة وتحطي شويييية منه وتمسحي وجهك، منها يزيل المكياج ويرطب بشرتك،،
سعره بـ ٣٢ ريال
أنصح بيه وبشدددة للي تحط مكياج كتير أو ماتحب تستخدم الصابون لإزالة مكياجها ( وللناس الكسولة زيي خخخ! )
المنتج التالت عبارة عن شاور جيل من نيفيا،
ريحتها مرة عالم تاني! والله عجبني فيها الحبيبات الصفراء الصغيرة ( يمكن ماتكون واضحة في الصورة )
حاطينها لحتى تساعد ع عملية تقشير/تجديد البشرة ( مع إني أحسها تدوب بسرعة )
مرة جميلة ورغوتها حلوة تبارك الله ^^
نجي للمنتج الرابع،،
مزيل اللمعان ( والرؤوس السوداء ) من جارنيير،
بصراحة أتعب لو أقول عنه رائع من هنا لبكرا!
هادا المنتج ينفع كل وحدة تعاني من البشرة الدهنية اللامعة خصوصاً وقت الدوام تحسيها تتعب بسرعة،
المنتج دا زي التونر خفيف وحلو تستخدمي قطنة طبية وتحطي شوية منه ع وجهك، ورح تلاقي لمعان الدهون خف مرة!
يستمر مفعوله لمدة ٤ ساعات، ممكن تستخدميه يومياً لو حابة
أنا عن نفسي أحب أحطه بعد ما أغسل وجهي بالغسول لحتى يدعم شغله وقبل المكياج لحتى ماتخرب الدهون شغلي،
بس المشكلة لمن أحطه وأنا رايحة للجامعة كلها نص ساعة وألاقي مفعوله اختفى تقريباً في أجواءنا الشبه صيفية الجميلة
( ع الرغم من إنو الخريف دخل،، الله يرحمنا برحمته بس! )
مرة ممتاز وأنصح به من كل قلبي
المنتج الخامس عبارة عن زيت للعناية وتغذية الشعر
( باراشوت سكريتس )
مرة حلو للي محتاجة تغذي شعرها أو تعاني من مشكلة تساقط الشعر، ترى مهم مرة تعتني بتغذية شعرك لو كان يتساقط عشان كدا اخترت المنتج دا،
تحطيه قبل الدش ع الأقل بنص ساعة ( من التعليمات المكتوبة ورا القارورة ) لحتى يقدر شعرك يمتص المواد المفيدة الموجودة في الزيت،،
تحطيه مرة وحدة في الأسبوع أو مرتين في الشهر زي ماتحبي ^^ أنا عن نفسي أفضل مرة كل أسبوع
سعره ١٠ ريال و٩٥ هللة!
المنتج السادس والأخير يعتبر صديق المنتج الخامس الصدوق اللي ماينفع يفترقوا عن بعض!
كريم باراشوت جولدن للشعر ( أنا أحب أختار -تغذية الشعر العادي- بدل ما أخربط نفسي بالأنواع التانية،، )
مررة استخدامه جميييل بطريقة منعشة!
لأنو بعد ما تستخدمي الزيت الجميل تحطي الكريم دا ع شعرك وهو مبلبل ( ضروري يكون مبلبل! )
لأنو سبحان الله بعد الدش ( أو لمن يكون شعرك بلبل ) يكون ضعيف وعندو قابلية يتقبل أي شي يجيه، فلمن تحطي الكريم
وهو مبلبل بإذن الله تضمني إن امتص كل المواد المفيدة، وعشان كدا كمان ضروري جدا ما تستخدمي السشوار لتجفيف شعرك وتخليه ينشف براحته ع هوا الغرفة العادي،،
بالنسبة للكريم أنا أحب أستخدمه بعد كل دش ^^ ريحته منعشة وتحسسك بالنظااافة :)
بالنسبة لسعره فآخر علبة ( كبيرة ) أشتريتها كانو عاملين عليها زيادة إضافية بـ ٩ ريال بس **
في أجمل؟؟
وبس!
طولت عليكم؟ ترى هادي أول تدوينة فممكن يكون فيها أخطاء وما إلى ذلك!
بصراااحة مررة استمتعت وأنا أكتب ^^ أحس كأني كنت قاعدة أعمل شوبنج مع شلة بنات * فلاي أواي! *
بس من جد أتمنى من كل قلبي تكونو استمتعتوا معايا في أول تدوينة حبيباتي،
وأحب أعلن شي مهم قبل ما أنهيها:
اللي عندها أي منتج، أي معلومة، أي حاجة استخدمتها ونفعتها حتى لو ماكانت مكياج أو منتجات عناية بالبشرة والشعر،
وحابة تشاركنا بيها، ترسلي هية ع وحدة من حساباتي ع النت
هنــــاآإأ ، أو تحطلي هية في الردود هنا تحت، وبإذن الله أضيف مشاركتها في التدوينة القادمة في الشهر الجاي على خير،،
أكييييد آرائكم وإقتراحاتكم تهمني!
وترقبوا التدوينة الجاية ( حيكون فيها أشياء كتير عن المكياج بإذن الله ^^ )
أنتبهوا ع نفسكم!
في أمان الكريم.
